Apotekari i jetës

Apotekari i jetës

Fatmir Terziu

Zëvendëson mendjen për praninë hyjnore

hap sytë dhe shikon të panjohurën

flet për një bollëk të kopshteve të mrekullueshme

a jemi kartona cigaresh,

apo tufa që enden mbi bar të ëmbël?!

Përgjigjet për këto nuk janë kurrë të nevojshme,

as në fundvit,

as në Krishtlindje,

megjithatë ne huazojmë gjithçka nga apotekari i jetës,

me kuptim të pakuptimshëm, me bindje.

Jemi në tufën e munguar me luanë të lodhur

që u ofrojnë muzikën e tyre dinastive të huaja

në bandat e pikturuara mureve të trashëguara,

me gurë nga Toka,

me gdhendje mjeshtri të harruar në varreza,

me lotë nga Qielli,

me sy të verbuar nga Dielli.

Është një arratisje e financave të fushatës së fundjavës

kur sillen në tryezë ferma kafshësh

dhe pastaj kthimi te gjërat themelore

dikush bën aritmetikën me përfitimet

Tjetri kalon sfidën e parë mendore

në gëzim-urimet e qindfishuara dixhitale,

të gatshme laboratorike, si në lojërat parashkollore,

plot perceptim, pa hapësirë, plot trukim,

që ekziston vetëm përtej këtyre dimensioneve tokësore

sepse kufijtë e Njeriut zgjerohen sa herë që i vëmë në dyshim.