… është Eden, jo thjesht një bust


Shënim: Në këtë fotografi foshnja disamujorshe është im Atë, Dail Terziu, në krahët e kushëririt të tij, Rustem Terziu, që vetë në atë kohë ishte një djalosh i ri.



… është Eden, jo thjesht një bust

Fatmir Terziu

Ai bebja në foto,

që mban një buzëqeshje në fytyrë,

me vezullime në sytë e tij dhe një lëkurë që shkëlqen,

Ti nuk ja ke idenë

si ëndërronte dikur

në gjetjen e vetvetes

dhe në luftën për të zëvendësuar shumë ëndrra.

Ai djaloshi në foto, dikur ka qarë

sikurse ndodh me ardhjen në jetë,

për herë të parë,

sytë kapin ambientin vërdallë

dhe zëri zbret,

në lëkurë,

në prekje

në ndjesi…

Ai djalosh i shumëpritur në foto, dikur s’e mendoi këtë

trupi i tij ishte i brishtë

ndaj e mësoi ngadalë,

Bota është një spikul gjigant karbonifer

varur në një fole të gazit hidroksik dhe “special”

duke u rrotulluar brenda boshllëqeve të një kupole të nxirë

me hapësirë ​​të pakufishme jashtë kontrollit imagjinar

nuk mund të thuhet se në cilën mënyrë do të shkoj

nuk ka asnjë parashikim që është fortësuar:

Çdo numër momentesh në këtë gjumë rrëzues

midis ferrit më të errët dhe horizontit të mëtutjeshëm.

Dhe e dëgjoja me zërin e hershëm

Unë biri i i tij, teksa më këshillonte

me shkathtësi me të gjithë çertifikimin jetik,

vendos arsyet e tua

mos fluturo me shashka dore

sytë do të mashtrohen, veshët nuk do të kënaqen

nuk ka asnjë mënyrë që të rimbursojmë garancitë hyjnore,

në këtë makineri mos e nxi faqen.

Kjo makineri

ka një gjysmë jete kuarkesh

dhe energjitë që dridhen në orbita të tjera

trajektoret

mbajtja e rrotullimit dhe pjesës informuese

nga ajo shkrepje e artë le të lirohet në mes të tendës

e errëta,

larg në Dhélindje, drejt në një mëngjes të ri,

përtej yjeve.

Prandaj shikoj brenda kësaj foshnje

vitet, peshën e një jete,

kam kaq shumë për të dhënë me një dhimbje

sikurse dashurinë e kam marë me vete

një dashuri që mund t’i besoj mendjes

ku këmbët nuk kërkojnë askund tjetër

shtrij ato rrënjë të mbira nga ai Trup,

është Eden, jo thjesht një bust.

Londër, 28 Shtator 2020


20 views

Shkrimet e fundit