Çifti Ruspi, dy figura të nderuara të komunitetit shqiptar në Mbretërinë e Bashkuar

3 days ago
3 min read

Në çdo komunitet ka njerëz që shndërrohen në simbol të përkushtimit, zemrës së madhe dhe punës së palodhur. Në komunitetin shqiptar në Mbretërinë e Bashkuar, padyshim dy prej tyre janë Hysen dhe Zamira Përfundi Ruspi. Një çift që nuk e ka kursyer asnjëherë kohën, energjinë dhe dashurinë për të ndihmuar të tjerët, duke u bërë një pikë referimi për çdo shqiptar që ka ardhur në këtë vend larg atdheut. Historia e tyre nis qysh në ditët e para të ardhjes në Mbretërinë e Bashkuar. Nuk ka qenë e lehtë, sfidat e integrimit, gjuhës, kulturës së re dhe nevojave të përditshme ishin të shumta. Por Hysen dhe Zamira nuk e panë këtë si pengesë. Ata e panë si mundësi për të ndihmuar të tjerët që përballeshin me të njëjtat vështirësi. Kështu nisi dhe Shoqata “Mother Tereza Albanian Union”, një hapësirë ku çdo shqiptar i ri mund të ndjehej i mirëpritur, ku çdo familje mund të gjejë ndihmë praktike, këshilla për integrim, dhe mbi të gjitha, një dorë të ngrohtë miqësore.

Ky përkushtim u shtri gjithashtu edhe tek të rinjtë dhe vajzat e komunitetit shqiptar, shumë prej të cilave sot janë edukatore dhe ndihmëse në arsim, duke dhënë kontribut në shkollat shqipe të arsimit plotësues. Përmes mbështetjes dhe orientimit të çiftit Ruspi, shumë prej tyre kanë mundur të zhvillojnë aftësitë e tyre, të gjejnë vendin në mësimdhënie dhe të kontribuojnë aktivisht në ruajtjen e gjuhës, kulturës dhe edukimit shqiptar në diasporë. Kur pandemia e Covid-19 goditi Mbretërinë e Bashkuar, shumë shqiptarë u ndjenë të izoluar dhe të pasigurt. Në atë kohë, Dr. Zamira Përfundi Ruspi dhe Hysen Ruspi ishin në frontin e parë të ndihmës. Një rast i paharrueshëm është ai i Përparim Muçës, një shok i komunitetit që u shtrua në spital. Regullat ishin të ngurta dhe vizitat ishin të kufizuara, por Hysen nuk e la të izoluar mikun e tij. Ai shkoi për vizitë, u ul për një bisedë dhe, së bashku me Zamirën, i ofruan ndihmë dhe mbështetje derisa gjendja e tij u përmirësua. Ky është vetëm një nga shumë shembujt e ndihmës personale dhe të kujdesshme që çifti Ruspi ka ofruar gjatë viteve.

Çifti Ruspi: Prof Hysen Ruspi dhe Dr Zamira Përfundi Ruspi

Një tjetër episod prekës është ai i një gruaje të moshuar shqiptare që rrëzohet gjatë shëtitjes së saj një mëngjes. Një intelektual anglez, duke parë situatën nga dritarja e shtëpisë së tij, nuk qëndroi indiferent. Ai ndezi makinën, e dërgoi gruan në spital dhe priti derisa ajo u sigurua se ishte mirë dhe e dërgoi në shtëpi. Të afërmit e saj mbetën të habitur dhe të prekur nga kjo gjest human. Këto histori, të mbajtura gjatë në memorien e komunitetit, tregojnë se solidariteti nuk njeh kufij dhe se ndihma njerëzore shpesh shfaqet në mënyra të papritura.

Dr. Zamira Përfundi Ruspi ka bërë që muaji mars, tradicionalisht simbol i fuqizimit të grave, të shndërrohet në një periudhë të veçantë për komunitetin shqiptar. Nga organizimi i festimeve për 8 Marsin, shpërndarja e trëndafilave dhe mesazheve personale, deri tek forumet edukative dhe online, ajo bën që çdo grua shqiptare të ndjehet e vlerësuar, e fuqizuar dhe pjesë e një komuniteti që e mbështet në çdo hap të jetës. Hysen Ruspi, përveç ndihmës praktike dhe koordinimit, ka qenë gjithmonë ura lidhëse midis komunitetit dhe institucioneve, duke mundësuar që informacioni dhe ndihma të arrijnë tek të gjithë në kohën e duhur. Së bashku me Zamirën, ata kanë krijuar një rrjet mbështetjeje që shtrihet nga kohët e vështira të integrimit në Mbretërinë e Bashkuar deri tek momentet kritike të pandemisë dhe përkujdesjes ndaj të rinjve dhe grave të komunitetit.

Çifti Ruspi nuk janë thjesht organizatorë apo aktivistë. Ata janë familje dhe miq për komunitetin, njerëz që japin më shumë sesa marrin. Në çdo hap të tyre shihen dashuria për njerëzit, ndjeshmëria ndaj vështirësive dhe besimi se secili mund të bëjë ndryshim. Ata kanë krijuar jo vetëm rrjete ndihme, por edhe lidhje të forta emocionale, duke bërë që çdo shqiptar i larguar nga atdheu të ndihet pjesë e një familjeje më të madhe. Në arsyen konkluduese, dhe transparente, Hysen dhe Zamira Përfundi Ruspi janë shembuj të rrallë të kombinimit të intelektualitetit me humanizmin. Ata na mësojnë se përkushtimi i sinqertë, dashuria për komunitetin dhe aftësia për të vepruar me zemër janë ato që lënë gjurmë të paharrueshme. Për shqiptarët në Mbretërinë e Bashkuar, ata nuk janë vetëm figura të nderuara, por një burim frymëzimi, një simbol i forcës, solidaritetit dhe shpresës. Çdo histori e tyre, nga ndihma ndaj të rinjve që sot janë edukatore, tek mbështetja e miqve dhe e të moshuarve gjatë pandemisë, tregon një mesazh të thjeshtë, por të fuqishëm: një veprim i vogël i zemrës mund të bëjë një ndryshim të madh në jetën e të tjerëve, dhe dashuria për komunitetin është vlera që mbetet e paharruar për breza të tërë.