...çfarë lojtari që humbëm!*

Poezi nga Armela Hysi

sfera dhe plani takohen në një pikë të vetme

ligj tredimensional i botës së verbër të

materies.

dimensionet e shpirtit njerëzor

pasionojnë turmat foshnjërake të etura

dehura nga adrenalina.

ozmoj bukurinë der' n'thjeshtësi

të njeriut. lundroj shqisat

detit të famës eshtrathyese

për t'u rikthyer

në pirgjet prej rëre

që fantazia i shndërron

në ishuj gjigand ajror

lumturie të qetë fëmije.

koha punon me klepsidra të gjakta

koha tallet me pendesat tona.

kohën nuk e ka krijuar Ati.

është iluzioni që përtypëm ritmikisht

mes fibrave të lëngshme të mollës.

sfera dhe plani takohen në një pikë të vetme

ligj tredimensional i botës

së verbër të materies.

për të është pika e bardhë e rifillimit

në një fushë të ndarë baras.

unë numëroj dimensionet e shpirtit

njerëzor që edukon muskujt në

vallen e egër të mbinjeriut.

koha mund të të vesh me plagë

të të çjerr sipërfaqen

por s'mund të ç'bëjë vorbullën e memories

së atyre që thërrmojnë qenien e vet

si ashkla për vënien në punë

rrotat e pandjeshme të historisë.

17 mars 2013

*Thënie e vet Diego Armando Maradonës

Nga dokumentari “Maradona by Kosturica”.

Nga Libri “Ujdhesës së Përrallës Tënde”Armela Hysi-2013-Sh.B. “Milosao”