Çfarë kanë Hajket?!




Kujtim: Milianov Kallupi dhe Fatmir Terziu

Poetit Milianov Kallupi, në vend të një përkujtimi...

Nga Fatmir Terziu


Çka janë Hajket,

flurudha, gërma apo fjalë?

Ndoshta kapje e radhë,

bijëza gjuhësh,

gjashtë sekonda për tu lexuar mbarë,

qepur nga përkujdesja e një shpirti poetik,

në shpirtin tënd atlas,

një kënd i artë,

si vend i lulëzimit të tyre.


Në gjuhën tënde dhe timen

haiku është shkruar shpesh mes tre linjave të shkurtra

ka krahë të tejdukshëm,

dhe të nderë, të gjatë e të lehtë mbi ullishten

e këmbëve. Është një lum,

ku janë ngulur mitet,

të lashtë, të hershëm, të pagjumë,

që ta vodhën ecjen.


Çka janë Hajket,

fundja pa ty,

njëra pranë tjetrës, pas emrit,

qëndrojnë kulturat e kapura duar-duar,

në një stinë malli.

Kudo ti mbete qafuar,

brenda vargut aromë djali,

mik i poetëve i paharruar,

e mbijetojmë mbi aktin e të parit,

copëzjetën e mbetur trazuar,

tek ndrit si monedhë e arit,

gjerdani yt Hajkor i paharruar.


Çfarë kanë hajket poet i nderuar, vërtet,

brenda një sofrabezi lamtumire,

ku jeta palon me çmimin e vet,

imazhin në ikje,

mes miqsh që kthejnë lotët Haik,

mëngjeseve, drekave, darkave në pritje,

të flasësh me mburrje për një mik,

pas Pushkinit kishte një Lermontov,

por pas teje, a do të ketë më Milianov?

46 views1 comment

Shkrimet e fundit