MË DËRGOI BABAI ME SHQERRA
-Kujtimit të gjyshes sime të fisme-
Nga Pozaet Qose
Në blegërima kthyer gjaku,
Që therin ajrin mes për mes,
Dëshirë e ndezur e një pragu,
Që lumturisht mëton të vdesë
Një faj i mbjellë në kopshte yjesh,
Që pranë të fton, të tretesh plagë
Për një fytyrë, të çelur syve,
Që vjen si fjalë e rron si flakë.
E zymtë lëndina, si gjyqtare,
S’jep dot as falje, as dënim,
Se është trazuar një shpirt vajze,
Të shkojë drejt puthjes, si flijim.
Nëpër stërkala blegërimash
I kthyer gjaku dje dhe sot,
Këndon, vrapon mes vetëtimash
Dhe vetëtimë pushon në tokë…