KU PO SHKOJNË KËTA TË DY?
Kapërcyer kanë fjalën,
malin , shiun, vetëtimën,
në duar- zjarrin,
teksa hapërojnë në ajër
në pllajën e dielluar bujarisht.
Përballë tingëllon jeshili
përanash asgjëja
qielli përmbi.
Për ku janë nisur këta të dy?
Mali hijerëndë
fija e barit përkundur nga era
kundërmimi rigonit
cinxëri, thellë gëmushës
livadhi blegëruar nga luleshqera
kanë dijeni,
se jo më larg se koha e mjaftueshme
për tu shuar zjarri
do shfaqet kroi,
kalldrëmi,
kisha
dhe mermeret rradhë rradhë
që heshturojnë hijshëm përkarshi.
Ku po shkojnë këta të dy
të lidhur gjuhësh
iu purpuron këmisha?
Përballë pylli
përanash asgjëja
qielli përmbi.