Gjithçka lëviz.
Rrjedhin në gulfa idetë
vrullit të lumit.
Nisur drejt pikave të pambërritura,
të heshturat zhurma përplasen, grinden, humbin.
E mbërritura e velur rrokulliset në zgrip,
jep shpirt.
Në vajin e humbjes zien platitja e hirtë.
Çahet si shegë hareja,
mëshiron plaga,
tokën e shpon dhembja,
mbin fara.
Shpleksen premtimet në vegja,
sa shpejt hollohen,
bëhen të vjetra,
rilindin prapë të rejat.
Një grumbull resh papritur bëhet shi,
ylberë të gjatë - zinxhir flori,
rrathë - rrathë si diell.
Më pas,
toka e lagur
ngre avuj në qiell.
Çfarë mbetet,
çfarë ikën,
zëëmbëltit u ngjirën,
prej errësirës në natën pus,
zbuluam dritën...
Lumi nxiton të derdhet nê det,
fryma një shpresë të re e ngjiz.
Gjithçka lëviz ...
*Herakliti : Nuk mund të futesh dy herë në të njëjtin lumë.
BABAZOTI
Babazoti me titull fisnikërie Mjeshtrok,
nuk studioi filozofi dhe as e njohu Volterin.
I bindej veç Nolit si kryepeshkop,
adhuronte si zot, Pitagorën, Arkimedin.
I falej peplumbces, këndores, perëndisë së pjellorisë,
qoshes, teoremës, brumit të gurit të zi e të bardhë.
Diturisë mjeshtëroke, xhindit të fantazisë,
gërqeles së pjekur, bukuranes me ajkë.
Qëndiste lulore me daltë e smiral të hollë,
në ura, kroje, pragje e shtëpi me harqe të lartë.
Në dritare dielli, prekte hapësirat me dorë,
frizitë vezulluese me orakuj drite në ballë.
Gjithë jetën ndërtoi, arkitekt e sevdalli i madh,
pranverë – vjeshtë, nga një vend Ballkani në tjetrin.
Babazoti njihte veç Nolin kryepeshkop,
adhuronte si zot, Pitagorën, Arkimedin.
KUR RROKULLISESH NË BAR
Kur rrokullisesh mbi bar
me drojë
mos cek frymëmarrjen tënde,
a këngën e pilivesave, brumbujve, gjinkallave
që ngjitet qiellit,
e lëshon
ndër kërcej tinguj të hareshëm.
Trembesh sepse je mëmë ndjenjash,
qysh në puthjen e parë mëson gjithçka
për të cilën ke heshtur...
Kur rrokullisesh mbi bar,
dalldiset ajri i luleve, i tokës,
kundërmon njomështi,
dritë dielli.
Sytë
liqene të mëdhenj, të jeshiltë,
mbushur me lotë të ngrohtë,
të trishtë...
Një ylber dyshimi ndehet përherë midis;
ëndrrën a mund ta mbërrish?
Kur rrokullisesh mbi bar
si mollë e kuqe!