Fejton
2 Marsi na bashkon...
Këtë nuk e them unë...
E thotë historia...
E thotë ajo e 2 Marsit 1444 kur Skënderbeu ua bëri duart bashkë princërve shqiptarë e i lidhi në besë. E ai “bashkim duarsh” u quajt “Besëlidhja e Lezhës” ndryshe “Kuvendi i Lezhës”
Besa u lidh në Katedralen e Shën Nikollës...
Organizatorë të kuvendit ishin prijësi i Principatës së Kastriotëve Gjergj Kastrioti.
Qëllimet e kuvendit ishin bashkimi i sa më shumë principatave të vendeve të Ballkanit për të ndalë e shporrë pushtuesit osmanë...
Princërit më të dëgjuar që morën pjesë ishin: Gjergj Arianiti; Andrea Topia, Stërnip i Karol Topisë, princ i krahinës midis Krujës dhe Durrësit, i shoqëruar nga dy djemtë e tij dhe nga i nipi Tanush Topia; Teodor Korona Muzaka, princ i Beratit dhe disa princër të tjerë të Myzeqesë; Gjergj Stres Balsha, princ i krahinës midis Krujës dhe Lezhës; Pal dhe Nikollë Dukagjini, principata e të cilëve zgjatej nga Drini në Kosovë gjer në kufi të Serbisë; Lek Zaharia Altisferi, princ i Danjës; Pjetër Spani, princ i Malësive të Shoshit e të Shalës i shoqëruar nga të katër djemtë e tij; Lek Dushmani, princ i Zadrimës; Stefan Çernojeviçi, princ i Malit të Zi. Veç këtyre u mblodhën në Kuvend edhe përfaqësues të republikës së Venedikut si vëzhgues.
2 Marsi 2020 na BASHKON...
Këtë nuk e them unë...
E thotë Ilir Meta, Iliri President...
Më 2 Mars 2020, fiks pas 576 vjetësh nga “Lidhja e Lezhës” krijohet “Lidhja e Bulevardit”
Bashkë, të shporrin njëherë e përgjithmonë Ramën dhe ti japin dermën puçit të shtetit....
Në “Kuvendin e Bulevardit”, me përjashtim të princeshës së LSI-së dhe disa aktorëve militantë, ende nuk ka ndonjë njoftim partiak se kush do të shkojë dhe me sa do të shkojë.
Diçka tha Luli, nëpër dhëmbë, pa përmendë “dhjetë mijë-shin” kërkesë e Metës. Mbase nuk e përmendi se ka të bëjë me taborin e “hurit dhe litarit” që me Ilirin kryekomandant nuk ka digë që e mban...
2 marsi 2020, e HËNA E PASTËR!
Deri sot, nga zëri i parë dhe zërat pas zërave, nuk është thënë asnjë fjalë pse të hënën 2 mars e jo të shtunën 29 shkurt apo të dielën 1 mars zhvillohet kjo demonstratë?!
Pse në ditën e parë të javës kur të gjithë urojnë “Javë të mbarë”!
Pse në një ditë të freskët pune?
Ka një shpjegim...
Fetar...
Të hënën e 2 marsit 2020 të krishterët ortodoksë e kanë të shenjtë, e kanë ditë reflektimi e fillim pastrimi të shpirtit.
Pas asaj dite nisin agjërimin, kreshmën që e përfundojnë më 19 prill 2020, në Ditën e Pashkëve me hekatombë qengjash qumështi.
Nuk e di se çfarë do të ndodhë “Të hënën e 2 marsit”.
Pastërti apo fëlliqësi...
Nuk e di kush do të pastrohet, Iliri, Basha, Monika apo Rama me kompanitë e tyre.
Sa për fëlliqësi të gjithë e dinë...
Fëlliqet Shqipëria...
Dhe kur?
Në prag të shpresës së fundit për të hyrë rrugës së Bashkimit Evropian...
Nuk e di në se Zoti do të na i ruaj mendtë.
Se trupit i ka ndryshuar vendin dy germave, nga trup në TURP...
Javë të mbarë!
E hënë, 24 shkurt 2020