Dy Poezi për Gruan

GRUAJA-ATDHEU YNË I  DASHURISË  

Gruaja-Atdheu ynë i dashurisë

një pikë loti në frymën tonë

pikturuar në librin e jetës!

Gruaja...

thellësi jete në kaltërsinë e qiellit.

Aromë nëne,

e përditëshme në gëzimet tona!

Në Atdheun tonë...të dashurisë

puthjet janë të gjata,

buzëqeshjet vazhdojnë

në këngë djepi e vuajtje,

në ditët me shi e flok të thinjura. 

Mars 2013

         NË DITËN E FESTËS

Sot qyteti...

mblodhi gjithë rrezet e diellit,

ngjyrosi sytë dhe buzët e grave!

Gratë,

u krehën aq bukur

sa gjaku u tingëllonte nëpër zemër,

të gjithave u vezullonte shpirti!

Ato  ecin kudo...

çdo çast në bregun e ditës

kërkojnë diejt e jetës.

Të thinjura nga mjegulla e malli

shkëlqimin ua kthejnë fëmijëve të tyre.

Mars 2013