FJALËT E MIA

Unë e di,
Për fjalë jam varfanjak,
Sidomos për fjalë klasike,
Dhe për fjalë të mëdha!

Nuk u ula në auditorë,
Ëndërr e vrarë,
Nuk mora kurrë leksione,
Që të mësoja shumë fjalë..

Në shtëpinë time,
S'kisha bibliotekë,
Të pasurohesha me fjalë klasike,
Të mendimtarëve të mëdhenj.

Herë era e ugarit,
Herë e luleve në lëndina,
Herë era  barit të livadhit,
Ju vjen fjalëve të mia!
Herë janë të ashpra,
Si kallot që kam në duar,
Por të gjitha janë të pastra,
Si uji burimi që del nga gurrat!