Kohë meditimesh (triptik)

Kostaq Duka

Kostaq Duka

Për ty njeri…..

Gëzimi,

hidhërimi,

shpresa,

zhgënjimi.

Të gjitha

formësojnë qënien tënde : Njeri!

Një çast pa to

bie në zbrazëtirë

aty ku vdekja ka të vetën  perandori.

Ëndrrat

Ëndrrat,

Vezulluese, ngacmuese, përtëritëse

me trajtat e së nesërmes të pritshme

me dhimbje,

me ditarin e rinisë i vendosa diku thellë

në sirtaret e vjetër të memories….

Në moshën e thinjave,

u hapa rrugë meditimeve

ngarkuar me dhimbjen,

për thërmimin e ëndrrave që s’panë të nesërme

dhe kotësinë e ëndrrave që vdekjen e bartën mbi shpinë të tyre që në lindje.

Deshifrim i shkrehjes në vallzim

Të dy e dimë. E dimë fort mirë

Jemi pjesë e dy lumenjve me rrjedhje e derdhje , krejt në drejtime të ndryshme.

E megjithatë

nën muzikën  dallgë shkumëzuese,

u shkrimë pak çaste,

për të thënë ndryshe,

dëshirën e fshehur në arkivat sekrete të shpirtit.