15-vjecarja nga Shqipëria që synoi të bëhej supermodelja e botës

Këze Kozeta Zylo, Zonjusha Mikaela Brokeri nga qyteti i Vlorës dhe Fadil Berisha

Bisedë në studion e Fadil Berishës me supermodelen Mikaela Brokeri

Zonjusha Mikaela Brokeri nga qyteti i Vlorës, u zgjodh supermodelja shqiptare për vitin 2009.  Është vetëm 15 vjeçe, nxënëse e shkollës së mesme “Naim Frasheri”, Vlorë. Ajo ka një të ardhme të shkëlqyer në botën e artit.  Në muajin Janar ajo do te shkojë në San Paolo, Brazil e shoqëruar nga fotografi i mirënjohur botëror z.Fadil Berisha dhe nëna e saj Alida për të marrë pjesë në konkursin: “Supermodelja e Botës”.  Ne i morëm zonjushes Brokeri këtë intervistë për lexuesit shqiptarë, në studion e z.Fadil Berisha në Manhattan.

Ju jeni supermodelja shqiptare e zgjedhur për vitin 2009, si ndiheni për këtë titull kaq të lartë?

Jam shumë e lumtur dhe krenare që jam unë fituesja e Supermodelja e Shqipërisë për vitin 2009 dhe që do të përfaqësoj vendin tim në një eveniment kaq të rëndësishëm, sic është Supermodelja e Botës, që do të zhvillohet në San Paolo, Brazil në 14 janar 2010.

Ju jeni vetëm 15 vjece, gjimnaziste nga qyteti i bukur bregdetar Vlora e Flamurit, me një trofe të shkëlqyer në dorë. Cila është ëndrra juaj dhe si do ta shfrytëzoni këtë titull për Atdheun tonë?

Endrra ime është që të bëhem një supermodele e famshme, të mbaroj studimet e larta, dhe të jem e plotësuar në cdo aspekt, duke qenë e tillë do të nderoj veten, familjen dhe Atdheun.

Ju do të shkoni në Brazil për të konkuruar si supermodele e botës, cila është ambicia juaj?

Normale që pretendoj që fituesja të jem unë, pse jo!  Por edhe në qoftë se kjo nuk ndodh unë përsëri do të vazhdoj të marr pjesë në aktivitete të ndryshme të kësaj fushe.

A ka ndikuar ky aktivitet shumë i ngjeshur tek mësimet në gjimnaz?

Ky aktivitet nuk ka ndikuar tek mësimet, sepse unë që e vogël jam mësuar me ngarkesë më të madhe se bashkëmoshatarët e mi, sepse përveç mësimeve kam studjuar instrument çdo ditë për disa orë.

Luani ndonjë vegël muzikore?

Po, unë luaj piano dhe violinë.

Kur keni filluar të luani?

Piano kam filluar të luaj që në moshën 6-vjeçare, dmth kam 10 vjet, kurse violinën ka pak kohë që e kam filluar.

Cila është mësuesja juaj e pianos?

Mësuesja ime e pianos është mami im Alida Brokeri, e cila ka mbaruar Akademinë e Arteve të Bukura dhe ka një përvojë gati 30 vjeçare në mësimdhënie.

Ju keni marrë me mijëra urime, cili ka qenë urimi që ju ka emocionuar më shumë?

Eshtë e vërtetë që kam marrë shumë urime, por ai që më ka emocionuar më shumë ka qenë i Emina Cunmulaj, një ndër supermodelet shqiptare të botës.

A e quan sakrificë rrugën e bukur, por dhe shumë të veshtirë që ke zgjedhur?

Cdo profesion ka vështirësitë e veta dhe kërkon sakrifica për të realizuar qëllimin që i vë vetes.

Ju jeni në studion e Fadil Berishës, cili ka qenë ndikimim i tij në veshje, në stil, në paraqitje dhe komunikim me publikun?

Përpara se të flas për këto dua të bëj një falënderim të madh për Z.Fadil  Berisha, i cili është një njeri me shpirt të madh, shumë i komunikueshëm. Ai më ka mësuar gjithçka që duhet për të qenë një modele.  Ndihma e tij është e pazëvendësueshme.

Së fundi, kujt ja kushtoni më shumë këtë sukses, dhe cilët kanë qenë ata që ju kanë inspiruar më shumë?

Këtë sukses unë ja kushtoj familjes time, babit, mamit dhe motrës të cilët më kanë inspiruar dhe sidomos babit tim të mrekullueshëm, i cili nuk m’u nda për asnjë cast që në fillim kur plotësova formularin, gjatë provave, natën e spektaklit dhe në të gjitha rastet ku më është dashur të shkoj për intervista, apo për emisione televizive në Tiranë.

Ju patët një fatkeqësi të madhe në këtë moment kaq të bukur të jetes suaj, humbet njeriun më të dashur babain tuaj që ju ka inspiruar aq shumë, si do t’i përmbushni ëndrrat e tij?

Humbja e babit më bën që të jem më e vendosur në arritjen e qëllimit tim që është njëkohësisht dhe përmbushja e ëndrrave të tij, gjithnjë do të kem shumë parasysh këshillat e tij aq të vlefshme.

Cdo t’ju thoni lexuesve të shumtë?

Lexuesve të  shumtë, bashkatdhetarëve tanë dua tju them që të mos pengojne vajzat e tyre, por të lejojnë që bukuria dhe mëncuria e tyre të njihet në të gjithë botën.

Paçi gjithmonë suksese dhe dëgjofshim së shpejti të jesh supermodelja e botës!

Faleminderit për intervistën znj.Zylo dhe ju shpreh mirënjohjen time për punën tuaj të palodhur në media!

Bisedoi Këze Kozeta Zylo

Ps: Fotot jane marre nga z.Fadil Berisha

Manhattan, 2010

Ps: Njoftojme lexuesit se zonjusha Brokeri konkuroi me dinjitet ne angjensine e famshme te modes Ford.  Supermodele e botes u zgjodh Katrina Karlina (Latvia), Baltic

Botoi gazeta “Illyria”, më 19 Janar, 2010