ALBANIAN POST UK - ACPE -  (REVISTA SHQIPTARE NE BRITANI TE MADHE): ME SYTË E HËNËS

ME SYTË E HËNËS
================================================================================
Fatime Kulli on 11/02/2018 19:29:00
 
ME SYTË E HËNËS
Një natë në të perënduar,
Ndjeva agun e frymës tënde
Të më gudulisë si fëmijë nëpër gushë,
Ndjeva fëshfëritjet e lëkurës tënde
Të lëkundeshin në barin e ujshëm.
Përbrenda ndjeva t’më lëviz stuhi e zjarrtë
Që ndizet rrallë në gjethet e kujtimeve,
Lidhet si gjerdanë në gardhin e zemrës
Për t’më ndriçuar mbrëmjet e mëngjeset.
Një natë në të perënduar,
U fundosa nën urinë e bebëzave të tua
Si skllave iu binda muskujve të ujitur,
Dashuria ngjethej nën shtroje ajri, e babëzitur...
Të gjitha puthjet i mblodha në prehër,
I përkunda me sytë rrezatues të hënës...
Në telat e kitarës formova një refren:
Ti je drita, ti je gjithësia, ti je dashuria”!